Me kërkesë të Komisionit Evropian, nga janari i vitit të ardhshëm në Kosovë do të fillojë regjistrimi bujqësor, i cili për herë të fundit është bërë në vitin 1960. Sipas zyrtarëve të Ministrisë së Bujqësisë, kjo do të sjellë një dobi të madhe për vendin tonë, si në përfitimin e granateve nga Bashkimi Evropian, e po ashtu edhe në eliminimin e informalitetit dhe konkurrencës së pandershme brenda sektorit të bujqësisë. I tërë projekti do të kushtojë 4.7 milionë euro.

Regjistrimi do të realizohet në bazë të metodës tradicionale “derë më derë”, me anë të pyetësorëve të regjistrimit për ekonomitë bujqësore, grumbullimi i të dhënave të sakta bujqësore dhe shpërndarja e rezultateve të tyre, të cilat do t’i mundësojnë Qeverisë, fermerëve dhe palëve tjera me interes t’i zhvillojnë politikat gjithëpërfshirëse të sektorit të bujqësisë dhe përmes fuqizimit të këtij sektori të ndikojnë edhe në rritjen dhe zhvillimin ekonomik të vendit.

Ministri i Bujqësisë dhe Zhvillimit Rural, Blerand Stavileci, të shtunën në një konferencë për media, duke shpjeguar, arsyet dhe dobitë të cilat do t’i sjellë regjistrimi i bujqësisë, ka theksuar se ministria që ai drejton bashkë me Entin e Statistikave të Kosovës, tashmë i kanë filluar punët përgatitore për regjistrimin bujqësor dhe rezultatet e pritura nga implementimi i këtij projekti, i cili do të zgjas deri në vitin 2014, janë hartimi dhe botimi i një serie të plotë të të dhënave të sakta për sektorin e bujqësisë, të hartuara dhe të përpunuara në përputhje të plotë me normat dhe standardet ndërkombëtare.

Sipas tij, nevojën për krijimin e të dhënave të sakta rreth ekonomive familjare, kohë më parë e ka ngritur si çështje edhe Komisioni Evropian në raportin e progresit.

“Ajo që është një ndër pikat më të rëndësishme se kjo ka qenë një kërkesë prioritare e Komisionit Evropian edhe pjesën që lidhet me bujqësinë në studimin e fizibilitetit dhe në raportin që do të bëhet në vjeshtën e këtij vitit. Pra, njëra nga kërkesat themelore ka qenë ajo që lidhet me të dhënat dhe regjistrat bujqësorë. Prandaj, njëri nga institucionet më relevante dhe drejtori përkatës për bujqësi e ka mirëpritur me një admirim të madh lajmin që edhe në Kosovë vitin e ardhshëm do të ketë regjistrim bujqësor. Për më tepër, ky është viti që në të gjitha shtetet e BE-së do të bëhet ky regjistrim”, ka thënë Stavileci.

Për më tepër, ministri Stavileci, tha se rezultatet e dala nga ky regjistrim do të jenë shumë të rëndësishme edhe për zhvillimin ekonomik, pasi që sipas tij, do të rrisin nivelin edhe në çështje të tjera organizative, logjistike dhe ligjore, të cilat kanë nevojë të planifikohen dhe të adresohen me kohë.

“Në masë të madhe kjo do të ndikojë që të zhduket informaliteti dhe të eliminohet konkurrenca jo e ndershme brenda sektorit. Ne sot kur flasim edhe fermerët edhe agrobizneset tona, gjithmonë kur flasin për relacionin prodhim vendor dhe import, flasin për konkurrencë jo të ndershme. Mirëpo, nga ajo që sot kemi në terren, ne shohim se ka një konkurrencë jo të ndershme edhe brenda vendit tonë, andaj detyrë e jona është që ne t’u sigurojmë hapësirë më të madhe dhe klimë më të mirë agrobizneseve dhe fermerëve të cilët bëjnë punë të ndershme, për t’i eliminuar pastaj shpërdorimet e ndryshme që ekzistojnë brenda sektorit”, ka thënë ministri Stavileci.

Një tjetër përfitim për të gjitha ata që do të regjistrohen, sipas ministrit Stavileci, do të jetë edhe ndërfutja e skemave të reja të subvencionimit dhe grantimit të cilat do të lidhen drejtpërdrejtë me cilësinë dhe sasinë, e cila sot është e pamundur të bëhet, në mungesë të këtyre regjistrave.

Implementimi i këtij projekti, i cili do të kushtojë rreth 4,7 milionë euro, do të financohet prej pjesës së mjeteve të mbetura në vlerë prej rreth 2,3 milionë euro nga regjistrimi i tanishëm i popullsisë dhe prej donatorëve të sektorit të bujqësisë dhe buxhetit shtesë të Qeverisë.

Përndryshe, projektligji për regjistrimin e bujqësisë, i cili i ka hapur rrugë implementimit të këtij projekti, është miratuar në parim këtë javë në Kuvendin e Republikës së Kosovës dhe përmes tij autorizohet ESK-ja për të mbledhur të dhënat në terren edhe për sektorin e bujqësisë. Rezultatet e përkohshme të regjistrimit, Enti i Statistikave të Kosovës, sipas ligjit duhet t’i shpërndajë deri më 28 shkurt 2014. Ndërsa, ato përfundimtaret do të shpërndahen në format elektronik dhe në letër, duke filluar nga 30 shtatori 2014. Kohëzgjatja e implementimit të projektit për regjistrimin e bujqësisë është dy vite, ndërsa projekti është në harmoni të plotë edhe me kërkesat e Komisionit Evropian.kohaislame

Qytetarët e Kosovës vazhdojnë t’i nënshtrohen rrezikut të madh nga ndotja që shkakton emetimi i gazrave nga lëndët djegës të makinave. Nga matjet e kryera nga laboratorë me pajisje të teknologjisë së fundit, që i kanë ofruar raporte gazetës, ka dalë se nafta që importohet zyrtarisht në Kosovë dhe që shitet në shumicën e pikave të karburanteve përmban deri në 1142 ppm, sasi kjo e sulfurit që është 114 herë më e lartë sesa që parashihet dhe lejohet të importohet me Udhëzimin Administrativ të Ministrisë së Tregtisë.
Në një dokument të Bankës Botërore të publikuar së voni thuhet se rreth 1.000 persona në Kosovë vdesin parakohshëm brenda vitit nga sëmundjet që shkaktohen nga ndikimi i grimcave që notojnë në ajrin e ndotur. Në bazë të këtij raporti që flet vetëm për të dhënat e dy viteve më parë, këto grimca besohet se shkaktojnë sëmundje të zemrës, kancerin në mushkëri dhe sëmundje të tjera të frymëmarrjes.

E, të dhënat që ka Instituti i Shëndetit Publik, afro 700.000 kontrolle mjekësore që realizohen në vit, kryesisht janë të diagnostikuara me sëmundje të frymëmarrjes dhe të rrugëve respiratorë, shkruan Koha Ditore.

Ndër shkaktarët kryesorë të këtyre sëmundjeve thuhet se është edhe prania e squfurit në karburante. /Telegrafi/kohaislame

Turqia ka shënuar një rritje të madhe ekonomike në dhjetë vitet e fundit. Por shumë ekspertë dyshojnë në qëndrueshmërinë e ekonomisë turke dhe kërkojnë ndryshime.

Megjithë parashikimet e zymta në Evropë, ekonomia turke po vazhdon të shënojë rritje shumë të shpejtë. Në këtë mënyrë ajo po shndërrohet në një vend shumë interesant edhe për investorët e huaj. Turqia ka shënuar në vitin 2011 një rritje ekonomike prej gati 7,5 %, ndërsa qeveria në Ankara shpreson se rritja gjatë këtij viti do të jetë katër për qind. Eksportet dhe importet turke po rriten që është edhe një sinjal tjetër për rritjen e fuqisë ekonomike të Turqisë. Ndërkohë ajo ka arritur nivelin e shtatë në Evropë dhe zë vendin e 15 në botë. Njëkohësisht Turqia është një prej vendeve me borxhet më të ulëta në Evropë, pas Suedisë dhe Çekisë. Borxhet e saj kapin shifrën prej 42 % të prodhimit të përgjithshëm bruto.
Këto zhvillime pozitive kanë bërë që agjencia e matjes së rentabilitetit Moody’s të rrisë notën e këtij vendi për një shkallë në Ba1. Kjo forcon pozicionin e Turqisë dhe rolin e saj ekonomik.
Ministri turk i financave Zafer Caglayan thotë se ngritja e notave nga agjencitë është “me vend por nuk mjafton”. Ai shpjegon se vendi i tij është varur më parë nga kreditë e Fondit Monetar Ndërkombëtar. Ndërsa tani ka premtuar se do të paguajë në fondin e FMN-së për shpëtimin e vendeve nga kriza rreth katër miliardë euro. Ndërkohë që edhe buxheti i Turqisë është më stabil se ai i shumë vendeve të Bashkimit Evropian. Caglayan thotë se vendi i tij meriton nota edhe më të mira boniteti.

Turqia nuk është imune ndaj krizës
Shumë ekspertë besojnë se politika ekonomike e qeverisë së partisë AKP në Turqi është një storje suksesi. Por ata parlajmërojnë se as ekonomia turke nuk është imune ndaj krizës ekonomike. Sipas tyre, kriza financiare në Evropë mund të influencojnë dukshëm edhe zhvillimet në Turqi dhe të ulë zhvillimin e shpejtë ekonomik.
Ekonomia turke varet shumë prej asaj evropiane, që do të thotë se kriza financiare mund të ketë pasoja shumë të rënda për këtë vend. 46 % e eksporteve turke shkojnë në vendet e Bashkimit Evropian. Përveç kësaj, edhe investimet kryesore në Turqi kanë ardhur nga Evropa (76 %). Më shumë se tre të katërtat e turistëve në këtë vend janë evropianë.
Ekspertët kontestojnë edhe qëndrueshmërinë e rritjes ekonomike në Turqi në dhjetë vitet e fundit. Kur partia AKP erdhi në pushtet në vitin 2002, prodhimi bruto i Turqisë ishte 243 miliardë euro. Më 2010 ishte rritur në 550 miliardë, ndërsa eksporti i vendit është dyfishuar.
Shumë ekspertë pohojnë se problemi kryesor i Turqisë mund të jetë deficiti në bilancin e këtij vendi. Në vitin 2011 deficiti buxhetor ishte rreth 10 % të prodhimit bruto – që është ndër më të lartët në botë. Importet në Turqi edhe më tej janë shumë më të ulëta se eksportet.
“Ky deficit është një sinjal se në Turqi shpenzohet shumë më shumë se sa që ëshë kursyer”, thotë eksperti i njohur turk Suleyman Yasar. “Por ky deficit vjen në radhë të parë nga sektori privat dhe jo publik. Dhe ne nuk presim ndonjë rrezik të madh prej tij”, shpjegon eksperti duke shtuar se një prej zgjidhjeve të mundshme do të ishte ulja e vlerës së monedhës turke.

Paralajmërimet nga optimizmi i tepruar
Eksperti ekonomik Mahfi Egilmez, thotë se deficiti i tanishëm është pjesë e strategjisë turke për zhvillim. Turqia ka një ekonomi të varur nga importi por kjo duhet të ndryshojë. “Turqia nuk mund ta vazhdojë bumin e dhjetë viteve ekonomike me të njëjtin model edhe në dhjetë vitet e ardhshme. Vendi duhet të zhvillojë një model të ri i cili parashikon më pak deficit, më shumë prodhim në vend dhe një aftësi më të madhe konkurruese në tregun e jashtëm”, thotë ai.
Egilmez është i kënaqur me zhvillimet e deritanishme në ekonominë turke. Këtë vit ka rënë edhe niveli i deficitit buxhetor, ndërsa eksporti është rritur.
Megjithatë ekonmisti Mustafa Sonmez paralajmëron nga optimizmi i tepruar. Ai thotë se ekspertët duhet të shikojnë të gjitha anët e ekonomisë turke, sepse jo të gjitha elementet janë në nivelin e duhur për një zhvillim të qëndrueshëm me këtë tempo. “Të ardhurat mesatare në Turqi edhe më tej janë në një nivel shumë më të ulët se në BE – gati përgjysmë më të ulëta”, thotë ai.

Pas ekzekutimit të pagesave direkte në vlerë prej 3,663,713 euro për sipërfaqet e fermerëve të mbjella me grurë, Ministria e Bujqësisë ka ekzekutuar pagesat direkte në vlerë prej 352,190 euro edhe për bletarët. Nga kjo mbështetje, e cila bletarëve sivjet po ju ofrohet për herë të parë, kanë përfituar gjithsej 769 bletarë, me gjithsej 35219 koshere bletë. Për të përfituar subvencione për bletë, në Ministrinë e Bujqësisë kishin aplikuar 1127 bletarë me gjithsej 54900 koshere, por vetëm 769 prej tyre kanë arritur t’i plotësojnë kriteret për subvencionim. Ndërsa, për shkak të deklarimit të rrejshëm të të dhënave dhe kontesteve të ndryshme, janë refuzuar gjithsej 358 bletarë, me 19681 koshere bletë.

Sipas të dhënave të Ministrisë së Bujqësisë, në Kosovë vlerësohet se janë rreth 6400 bletërritës, me rreth 75000 koshere bletë. Ndërsa, mesatarja e prodhimit të mjaltit në këtë vit, sillet në rreth 13 kilogramë për koshere bletësh.

Për t’i stimuluar bletarët që të rrisin numrin e bletëve, Ministria e Bujqësisë këtë vit i ka subvencionuar ata me nga 10 euro në koshere dhe kriter kryesor për të përfituar nga kjo përkrahje ka qenë që bletarët të kenë minimum 30 dhe maksimum 500 koshere bletë.koha/kohaislame

Panairi “Dredhëza 2012” i mbajtur në Sheshin e Prishtinës, është treguar i suksesshëm pasi që kultivuesit e kësaj kulture bujqësorë për katër ditë sa ka zgjatur ky panairi kanë shitur 6.7 tonë dredhëza në vlerë prej 13.535 euro.

Sipas të dhënëve të Ministrisë së Bujqësisë Pylltarisë dhe Zhvillimit Rural (MBPZHR), në gjithë territorin e Kosovës me dredhëz janë të mbjella 153 hektarë, për deri sa vitin e kaluar kanë qenë 138 hektarë.

Më 2011, kjo ministri përmes granteve investive ka përkrahur 40 fermerë, në vlerë prej 72 mijë euro.

Në panairin “Dredhëza 2012” kanë marrë pjesë 15 kultivues të dredhëzës./tribunashqiptare/kohaislame

Deri në vitin 2015 në shtetin verior indian Jammu dhe Kashmir do të përfundojë ndërtimi i urës hekurudhore më të lartë në botë. Ajo do të ndërtohet mbi lumin Chenab në një lartësi prej 359 metra, shkruan gazeta “The Times of India”.

Për ndërtimin e urës me gjatësi prej 1.3 km do të nevojiten 25 mijë tonë metrikë çelik. Kostoja e ndërtimit do të tejkalojë shumën 5.1 miliardë rupi indian (100.000.000 $)./koha/kohaislame

Marrja e kredive nga bizneset dhe qytetarët e Kosovës në bankat komerciale po vazhdon të trashët për çdo ditë. Pavarësisht kamatave të larta që bankat po ofrojnë, qytetarët nuk po hezitojnë të futen në kredi.

Moshezitimin e tyre e vërteton edhe fakti se deri tani rreth 500 mijë kredi në vlerë prej rreth 2 miliardë eurove janë lëshuar nga bankat komerciale që veprojnë në Kosovë. Sipas zyrtarëve të Bankës Qendrore të Kosovës (BQK), këto shifra janë deri në muajin prill të këtij viti, shkruan gazeta “Lajm”.
Ata kanë bërë të ditur se gjatë të njëjtës periudhë kohore edhe institucionet mikrofinanciare kanë lëshuar mbi 55 mijë kredi, në vlerë prej 101 milionë e 881 mijë euro.
E, për përfaqësuesit e bizneseve vendore, marrja e këtyre kredive nga qytetarët e Kosovës është tejet e lartë, por thonë se për momentin shpëtimi i vetëm për ta është kredia.
“Numri i kredive të lëshuara më 30. 04. 2012 nga bankat komerciale është 411 mijë 859. Shuma e kredive të lëshuara nga bankat komerciale është 1 miliardë e 718 milionë e 492 mijë e 199 euro. Kurse, numri i kredive të lëshuara nga institucionet mikrofinanciare më 30. 04. 2012, është 55 mijë e 315, ndërsa shuma është 101 milionë e 881 mijë e 123 euro”, ka thënë zëdhënësi i Bankës Qendrore të Kosovës (BQK), Besnik Kada.
Ndërkaq, Agim Shahini nga Aleanca Kosovare e Biznesit, thotë se bankat në një mënyrë po i shfrytëzojnë qytetarët, ngase sipas tij, këta po kanë nevojë për kredi dhe, bankat nuk po i ulin kamatat. Ai thotë se për këtë çështje shpeshherë ka edhe mosmarrëveshje mes qytetarit dhe bankës.

Kreditë e lëshuara nga sistemi bankar, sipas BQK-së, shënuan një ritëm më të shpejtë të rritjes gjatë vitit 2011, duke regjistruar një rritje vjetore prej 16, 4 %, krahasuar me rritjen prej 13.2 %, që ishte shënuar në vitin 2010.
Kreditë për ndërmarrjet vazhdojnë të përfaqësojnë pjesën më të madhe të kredive, me pjesëmarrje prej 69.5 %.
Në anën tjetër, kreditë e lëshuara për ekonomitë familjare përbëjnë 30, 5 për qind të kredive të përgjithshme. Struktura e kredive sipas afatit të maturimit vazhdoi të dominohet nga kreditë me afat mbi 2 vjet, të cilat përfaqësuan 71, 3 % të gjithsej kredive.
Kreditë me afat maturimi më të ulët se 1 vit, në vitin 2011 kishin pjesëmarrje prej 21, 1 %. Ndërsa, pjesëmarrja e kredive me maturitet mes 1 dhe 2 vite, ishte 7, 3 %.
Dallimi ndërmjet normave të interesit në kredi dhe depozita në vitin 2011 ka qenë 10, 6 %, krahas 10, 9 % sa ka qenë në vitin 2010.
Gjatë periudhës janar-dhjetor 2011, norma mesatare e interesit në kreditë e ndërmarrjeve ishte 12, 9 %, ndërsa norma mesatare e interesit në kreditë për ekonomitë familjare ishte 11, 9 %./kohaislame/

Maqedonia rrezikon të humbë transportin hekurudhor të mallrave përmes Korridorit 10, prej kur kompanitë transportuese evropiane kanë filluar të favorizojnë Korridorin 4, linjë hekurudhore, e cila për momentin kalon në disa shtete të BE-së dhe përfundon në Turqi.  Sipas përfaqësuesve nga sektori hekurudhor, nga kjo situatë nuk është e rrezikuar vetëm Maqedonia, por të gjitha shtetet që dalin nga ish-Jugosllavia.

Shkak kryesor për uljen e transportit janë formalitetet e shumta doganore dhe kufitare. ‘Operatorët e hekurudhave vetëm të bashkuar mund t’i përgjigjen konkurrencës së  madhe dhe të kthejnë pozicionin në sistemin e transportit të mallrave. Në vitin 2010, trafiku i përgjithshëm i mallrave midis vendeve të Aleancës ka arritur shifrat prej  62.5 milionë tonë, pra 21.4 për qind më shumë se në vitin 2004’, tha Marjan Masiç, përfaqësues i hekurudhave sllovene. Sipas Masiç problem shtesë për Maqedoninë paraqet edhe mungesa e liberalizimit të trafikut hekurudhor. ‘Nëse liberalizimi i këtij tregu mbyllet deri në hyrjen e Maqedonisë në BE do të vihet në pikëpyetje edhe aleanca e formuar mes kompanive hekurudhore nga ish-shtetet e Jugosllavisë’, tha Marjan Masiç, përfaqësues i hekurudhave sllovene. Për këtë qëllim aleanca e formuar nga kompanitë shtetërore hekurudhore nga ish-shtetet jugosllave ka filluar të punojë në revitalizimin e Korridorit 10 me qëllim që të krijohen kushte teknike për rritjen e konkurrencës së tij./koha/kohaislame

Në këtë situatë të zymtë ekonomike, që vjen nga Perëndimi, shpëtimi mund të vijë nga lindja. Mbi 100 kompani të huaja, kryesisht nga vendet islamike, kanë mbërritur në Tiranë në një takim të posaçëm biznesi me kryeministrin Berisha, ku kanë nisur të flitet për financimin e projekteve konkrete.

“Kjo konferencë po shqyrton dhe do shqyrtojë projekte të një rëndësie të madhe për vendin, si për hidrocentralin e Skavicës, që plotëson në mënyrë përfundimtare kaskadën e Drinit”, deklaroi kryeministri Berisha.

Banka Islamike për Zhvillim është shndërruar vitet e fundit në një nga financuesit më të mëdhenj të projekteve publike, përfshirë dhe rrugën Tiranë-Elbasan.

Qëllimi i forumit është të sjellë në Shqipëri edhe kapitalet private nga këto vende, në një kohë që kriza ka shterur kapitalet nga partnerët tradicionalë të Perëndimit.

“Ne jemi duke diskutuar me qeverinë shqiptare dhe disa përfaqësues të sektorit privat për një sërë projektesh që do të sjellin prosperitet për qytetarët shqiptarë. Pavarësisht krizës globale, ne do të jemi këtu për të mbështetur projektet me qëllim zhvillimin e Shqipërisë”, deklaroi Halid Al Abudi, drejtor i Korporatës Islamike për Sektorin Privat.

Veç energjitikës, në konferencë do të diskutohet edhe për projekte të tjera në fushën e turizmit, bujqësisë dhe degëve të tjera të ekonomisë.

Kjo është konferenca e tretë e investimeve, e organizuar nga Banka Islamike. E para është mbajtur në vitin 1995, ndërsa e dyta në vitin 2009.

Kjo është konferenca e tretë, e cila ka sjellë në Tiranë numrin më të madh të investitorëve nga vendet islamike dhe kur për herë të parë po flitet për financimin e projekteve konkrete, në formën e investimeve direkte, por edhe ato të partneritetit publik-privat./tch/kohaislame

Blerim Shefkiu nga Përlepnica e Gjilanit nuk do të ketë më telashe për gjetjen e tregut për shitjen e pemëve të tij. Ai e ka të sigurt tregun në tërë Kosovën për shitjen e dredhëzave, mollëve edhe kumbullave të tij. Këtë ia ka mundësuar instituti Riinvest, i mbështetur nga Zyra Zvicerane për Zhvillim dhe Bashkëpunim (SDC) që ka grumbulluar pemëtarët. Të bashkuar nën ombrellën e Unionit të Pemëtarëve të Kosovës ata kanë themeluar një brend të ri.

“Kjo është një ndihmë e madhe për prodhuesit vendorë. Prodhimet tona tani identifikohen, konsumatorit po i ofrohet një siguri më e madhe me të dhënat e detajuara për vendin e prodhimit, prodhuesin dhe kohën e vjeljes. Na kanë ndihmuar edhe me gjetjen e tregut”, thotë fermeri Blerim Shefkiu.

Sipas tij, pemëtarët janë ndihmuar edhe me mjete materiale dhe këshilla profesionale.

“Për neve ka qenë një ndihmë e madhe materiale, por edhe profesionale. Neve na kanë furnizuar me paketime të reja për produktet tona që kanë logon e Unionit”, thotë Shefkiu.

Drejtori ekzekutiv i Riinvestit, Lumir Abdixhiku, thotë se nga kjo javë nëpër marketet e Kosovës, kosovarët do të kenë mundësi të konsumojnë frutat vendore me pamje, paketim e emërtim të ri.

“Instituti Riinvest, i mbështetur nga Zyra Zvicerane për Zhvillim dhe Bashkëpunim (SDC), pas një angazhimi 18-mujor kanë finalizuar njërin prej aktiviteteve në fushën e hortikulturës e që në esencë ka pasur themelimin e një brendi të përbashkët të prodhimit të frutave vendore, ‘Frutat e Kosovës’. Në këtë periudhë nëpërmjet fascilitimit të bërë nga Riinvest, prodhuesit e frutave kosovare janë bashkuar dhe nën ombrellën e Unionit të Pemëtarëve të Kosovës kanë themeluar një brend të ri”, theksoi Abdixhiku.

Procesi i fascilitimit dhe krijimit të brendit ka pasur tri faza. Në fazën e parë është bërë bashkimi i gjithë përfaqësuesve në zinxhirin prodhues, përfshirë kultivuesit e frutave dhe shitësit e tyre nëpër gjithë Kosovën.

“Rezultati i përbashkët i kësaj faze ka qenë lindja e nevojës për unifikim të fuqive vendore dhe bashkëpunimi më thelbësor në zinxhirin prodhues”, thotë Abdixhiku.

Në fazën e dytë janë zhvilluar standardet e brendit dhe kriteret që duhen përmbushur për gjithë prodhuesit e frutave kosovare që duan të shfrytëzojnë këtë emërtim. Këto kritere tanimë kontrollohen nga Unioni i Pemëtarëve të Kosovës dhe jo çdo frut kosovar mund të shitet me këtë emërtim.

“Janë disa standarde bazike që duhen plotësuar paraprakisht. Faza e fundit është marrë me dizajnimin dhe paketimin e produkteve në fjalë”, theksoi ai.

Abdixhiku konsideron se me një projekt të tillë është rritur vlera e produkteve kosovare të cilat më herët janë shitur pa ndonjë emërtim të veçantë, pa ndonjë kujdes në paketim dhe pa ndonjë standard verifikues të kualitetit.

“Emërtimi i produkteve kosovare me brendin ‘Frutat e Kosovës’ do të lehtësojë identifikimin e produkteve nga konsumatorët dhe rrjedhimisht do të rrisë kërkesën për këto produkte. Konsumimi i produkteve vendore në radhë të parë do t’u ndihmojë prodhuesve kosovar që përkundër çdo vështirësie në ambientin biznesor megjithatë arrijnë të japin kualitet dhe fruta shumë herë më konkurrente se ato të rajonit. Një konsum i tillë do t’i shërbente gjithashtu Kosovës që paratë e konsumit të mbesin brenda e jo të eksportohen jashtë”, thotë Abdixhiku.

Ai beson se krijimi i vendeve të reja të punës në vend mund të bëhet vetëm me fuqizimin e prodhimit vendor dhe me një sjellje më racionale ndaj konsumit të brendshëm./koha/kohaislame