Drejtori i Kompanisë Tavanir(prodhimit, transportit dhe shpërndarjes së energjisë elektrike në Iran), Z. Mohamad Hosein Motevalizade, është shprehur :”RII është prodhuesja dhe eksportuesja më e madhe e energjise elektrike në rajonin e Lindjes së Mesme”.
Çdo orë ekspotohen nga Irani drejt shteteve fqinje 1500 megavat energji elektrike. Konsumimi i energjisë elektrike në Iran ka pësuar ulje që do të thotë se është krijuar një mundësi e mirë për eksportimin e energjisë në vendet fqinje. Vetëm gjatë 4 mujorit të fundit eksporti i energjisë elektrike nga Irani është rritur me 46 % më shumë në krahasim me këtë periudhë në vitin e kaluar. RII shkëmben energji elektrike me Armeninë, Pakistanin, Turkmenistanin, Turqinë, Republikën e Azerbajxhanit, Irakun, Afganistanin etj/irib

Departamenti i Metrologjisë së Kosovës, që vepron në kuadër të Ministrisë së Tregtisë dhe Industrisë, nënshkroi sot memorandum bashkëpunimi me Institutin e Metrologjisë Kombëtare të Turqisë, njofton MTI përmes një komunikate për medie. Përmes kësaj marrëveshje metrologjia e Kosovës do të mbështetet nga Instituti i Metrologjisë së Turqisë në disa fusha duke përfshirë rregulloret teknike dhe standardet, shkëmbimin e njohurive shkencore dhe teknike, zbatimin e projekteve të përbashkëta për zhvillimin e metrologjisë, shkëmbimin e informatave, organizimin e seminareve dhe konferencave dhe harmonizimin e rregulloreve teknike.

Zëvendëskryeministrja dhe Ministrja e Tregtisë dhe Industrisë në fjalën e saj hapëse tha “Kjo marrëveshje është tejet e rëndësishme për ne sepse sistemi i metrologjisëështë elemtni kyc për përmirësimin e infrastrukturëssë cilësisë në Kosovë”. Ajo shtoi se Kosova ka nevojë për mbështetje nga vendet që kanë një përvojë në zhvillimin e sistemit të mirëfilltë të metrologjisë dhe se Turqia është një shembull i mirë për këtë.

Ndërsa, Drejtori i Departamentit të Metrologjisë, Agron Shurdhani tha se kjo është marrëveshja e parë në nivel nacional dhe beson se do të ketë bashkëpunim të mirëfillt me Turqinë.

Në anën tjetër Drejtori i Institutit të Metrologjisë së Turqisë, Fatih Ustuner (TUBITAK UME) tha se është i gatshëm të ndaj eksperiencën e insitutit që ai drejton dhe bashkëpunoj me departamentin e metrologjisë së Kosovës. “Dëshiroj të kemi një plan të veprimit të Memorandumit të Bashkëpunimit dhe të kemi rezultate konkrete” theksoi Ustuner.

Kjo marrëveshje mbështet krijimin e infrastrukturës së domosdoshme metrologjike (laboratorët e akredituar të kalibrimit, etalonët nacional, metrologët profesionistë) me qëllim të vendosjes së saktësisë dhe besueshmërisë në Kosovë dhe ngritjes së cilësisë së produkteve dhe shërbimeve në Kosovë.

Gjatë ditës, përfaqësuesit nga Instituti i Metrologjisë nga Turqia të shoqëruar nga zyrtarë të Departamentit të Metrologjisë, kanë vizituar Laboratorin e verifikimit të njehsorëve në KEK dhe në Institutin e Shëndetësisë Publike. Ndërsa gjatë ditës së nesërme do të vizitojnë Laboratorin e ujëmatëseve si dhe puntoritë e metaleve të çmueshme dhe artizanaleve në Prizren. Pas vizitave do të konkretizohen edhe detajet për mbështetjen që mund të japë instituti i metrologjisë së Turqisë.koha/kohaislame

Mbi 63% është niveli i humbjeve të energjisë në pjesën veriore të Kosovës, e kjo sipas Auditorit Gjeneral paraqet sfidë për Korporatën Energjetike të Kosovës.

Humbjet e energjisë se prodhuar për shitje nga KEK-u vlerësohen të jen të nivelit të lartë, shkruan “Kosova Sot”.
Raporti i Auditorit të Përgjithshëm për Pasqyrat Financiare të vitit 20122 për KEK-un, ka vlerësuar se kjo e fundit nuk arrin të faturojë rreth 37% të energjisë se prodhuar.
“Prej tyre 16.8% nuk faturohen për shkak të humbjeve teknike apo që krijohen nga shpërndarja e energjisë. Ndërsa humbjet komerciale janë rreth 20%, e këtu janë përfshirë edhe 4.5% humbjet në pjesën veriore të Kosovës. Humbjet komerciale shkaktohen nga përdorimi ilegal i energjisë, si dhe nga pamundësia e matjes dhe faturimit nga KEK-u” thuhet në raportin e Auditorit Gjeneral./Indeksonline/kohaislame

Rënia e dërgesave të emigrantëve do të ketë pasoja në ekonominë kosovare, thonë ekspertë për çështje ekonomike.

Sipas një raporti të UNDP-së dhe Organizatës Ndërkombëtare për Migrim, thuhet se në tre mujorin e parë të këtij viti, remitencat kanë rënë për 6 milionë euro, ndërsa në vitin 2011 këto dërgesa kanë rënë për 14 për qind, krahasuar me vitin 2010.

Lekë Musa, nga Oda Ekonomike Amerikane në Prishtinë, thotë për “Radio Evropa e Lirë” se ndër financuesit kryesorë të kësaj ekonomie dhe konsumit vendor janë remitencat nga jashtë.

“Mos harroni se gjatë këtyre viteve, pas luftës, dy burimet kryesore të financimit kanë qenë remitencat dhe donacionet nga jashtë. Tani, meqenëse kemi një tkurrje të donacioneve që kanë ardhur nga jashtë, mirëpo nga ana tjetër një rënie të remitencave, të dy këto shkurtime do të kenë pasojë për ekonominë e Kosovës”, tha Musa.

Shumica e emigrantëve që investojnë në Kosovë nuk i kanalizojnë mjetet në aktivitete produktive për gjenerim të të ardhurave, apo punësimit. Sipas raportit të fundit, rreth 90 për qind e këtyre mjeteve financiare shfrytëzohen për konsum bazik nga pranuesit.

“Emigrantët kosovarë kanë financuar konsumin në shumë familje. Ky zvogëlim do të ketë pasoja në uljen e kërkesës brenda në Kosovë. Ulja e kërkesës brenda në Kosovë do të ndihet në mënyrë indirekte edhe te biznesi, pasi do të ketë ulje të kërkesave për mallra dhe shërbime, si nga importi ashtu edhe prodhimit vendor. Kjo reflekton edhe në shkurtimin e vendeve të punës”, thekson Musa.

Eksperti tjetër i ekonomisë, Muhamet Sadiku, konsideron se ulja e dërgesave nga jashtë duhet të trajtohet si problem. Ai konsideron se arsyeja e rënies se remitencave është kriza ekonomike në eurozonë.

“Kriza po merr përmasa serioze dhe të parët që do të goditën në Bashkimin Evropian janë të punësuarit, sepse kompanitë multinacionale, kompanitë tjera, vazhdojnë të reduktojnë numrin dhe kjo do të sjellë probleme edhe te kosovarët të cilët janë duke punuar në perëndim”, shprehet Sadiku.

Dërgesat e mjeteve financiare nga familjarët e tyre që jetojnë në vende të ndryshme të Evropës, në vitin 2011 kanë qenë 379 milionë euro, përderisa në vitin 2010 këto dërgesa kanë qenë 442 milionë euro. /Telegrafi/kohaislame

Rendimentet e grurit në fushatën e sivjetme të korrje-shirjeve, ashtu sikurse në vitin e kaluar, Kosovën përsëri po e rendisin në njërin nga vendet e para në rajon për rendimente të larta në prodhim.
Sivjet fushata e korrje-shirjeve, si rezultat i kushteve të favorshme klimatike ka filluar më herët se vitin e kaluar dhe deri më tash, sipas të dhënave të komisioneve komunale, janë korrur rreth 30 për qind e sipërfaqeve të mbjella me grurë.

Me mbarëvajtjen e procesit të korrje-shirjeve të grurit, të kënaqur u shprehen edhe kryeministri Thaçi dhe ministri Stavileci, të cilët sot e vizituan fermerin Valon Vehapi, në parcelën e tij në fshatin Suhadoll të Lipjanit.

“Edhe sivjet kemi një rekord në rendimentet e grurit dhe i uroj të gjithë qytetarët dhe bujqit kosovarë për këtë sukses. Kosova po shndërrohet me të vërtetë në një hambarë të fuqishëm, prandaj jam këtu që t’i inkurajoj edhe më tutje bujqit kosovarë, por edhe të zotohem se Qeveria e Kosovës do t’i rrisë përgjegjësitë edhe më tepër, që të jetë sa më afër bujqve, në mënyrë që të kemi suksese të reja”, tha kryeministri Thaçi.

Ndërsa, ministri Stavileci tha se gjithnjë e më shumë po vërehen përparimet dhe se edhe në këtë vit fermerë tanë po i korrin frytet e punës së tyre të vyeshme, e cila ka nisur që nga vjeshta e vitit të kaluar.

“Sivjet janë rritur sipërfaqet e mbjella me grurë me rreth 6 mijë hektarë të rinj. Kemi rreth 9 mijë fermerë që e mbjellin këtë kulturë, që kanë përfituar pagesa direkte prej 100 eurosh për hektarë dhe tash jemi duke i subvencionuar edhe në derivate të naftës”, deklaroi Stavileci.
Ai tha se kjo po ndikon që të shtohet edhe prodhimtaria vendore dhe se po i detyron dhe obligon që viteve të ardhshme të kujdesen edhe më tepër. “Besojmë se me këtë rezultat, me këtë angazhim të përbashkët të të gjithë neve, viteve të ardhshme do të kemi edhe më shumë projekte dhe programe për t’i mbështetur fermerët e vendit tonë”, përfundoi Stavileci.

Në anën tjetër, edhe fermeri Valon Vehapi ishte i kënaqur me rendimentet që po i arrin. Ai tregoi se ka të mbjellë 70 hektarë me grurë dhe se rendimentet mesatare sillen prej 5500-6000 kilogram për hektarë. “Mund të them se ky vit s’do të harrohet për një kohë të gjatë tek fermerët. Ishte një vit i mirë, bimët janë të shëndosha, kushtet atmosferike kanë qenë shumë të mira për rritjen e grurit dhe falënderoj edhe Qeverinë për mbështetjen që u ka dhënë fermerëve”, tha Vehapi, i cili tregoi se ka përfituar 7 mijë euro subvencione për sipërfaqet që ka mbjellë me grurë.
Rendimentet mesatare në nivel vendi, sipas përllogaritjeve fillestare, po sillen në rreth 4 mijë kg për hektarë. Ndërsa, sipas raporteve të drejtorive komunale, sipërfaqe të mbjella me grurë në këtë vit janë gjithsej 83.875 hektarë.
Mbjelljet vjeshtore të grurit janë përkrahur me mbi 3.6 milionë euro nga Ministria e Bujqësisë, kurse fushata e korrje-shirjeve është duke u mbështetur me 500 mijë euro.

Drejtori i këtij projekti, Mustafë Grainca ka thënë për Kosovapress, se ky projekt i financuar nga KE-ja dhe Komuna e Ferizajt si lidere, ka të bëjë me zhvillimin e turizmit në regjionin lindje të Republikës së Kosovës.

“Në këtë projekt, i cili ka filluar së implementuari nga shkurti i vitit 2012, inkorporohen 6 komuna të regjionit lindje, të cilat përmes këtij projekti synojnë t’i ekspozojnë resurset turistike të regjionit”, ka thënë Grainca.

Merret vesh se Komuna e Ferizajt është lidere, dhe se krahas 380000 eurove që ka ndarë KE-ja, ajo do të participojë me afro 50 mijë euro. Grainca shpjegon se në kuadër të këtij projekti Komuna e Ferizajt, ka nisur rehabilitimin e rrjedhës së lumit Nerodime në vetë zonën e Bifurkacionit.

“Punimet në këtë zonë kanë filluar dhe projekti do ta bëjë funksional këtë fenomen. Aty do të ndërtohet ura, do të rivitalizohen dy mullinj ekzistues, do të rregullohet trotuari dhe do të vendoset sinjalistika në tërë territorin e komunës, e cila do t’i shënojë vendet turistike”, ka thënë Grainca, për të shtuar se edhe komunat tjera të regjionit do të përfitojnë nga shpërndarja e nën grandeve të këtij projekti.

Në anën tjetër, kompania “Europarku” ka filluar punën në rehabilitimin e kësaj zone me rëndësi jo vetëm për Ferizajn, por edhe për vendin. Drejtori i kësaj kompanie, Afrim Breznica, ka thënë se është filluar me pastrimin e zonës së bifurkacionit dhe me vendosjen e bazamentit të urës.

“Ky është fillimi i punimeve, gjatë 90 ditëve sa është paraparë që të kryhet ky projekt, do të bëhet edhe hapja e kanalit të ujit, rregullimi i trotuarit në pjesë prej mullirit të Nikës deri të ura dhe pastrimi i hapësirës për rreth mullirit të madh”, ka thënë Breznica.

Kjo zonë atraktive e komunës së Ferizajt, pritet që pas kryerjes së punimeve do të jetë mjaftë shumë e vizituar, ngase përmban fenomenin e Bifurkacionit, të dytin në botë i cili e ndanë Lumin Nerdodime në dy rrjedha, të cilat asnjëherë nuk bashkohen, duke bërë që njëra të derdhet në Detin Adriatik dhe tjetra në Detin e Zi.kohaislame

Diaspora kosovare vitin e kaluar ka dërguar rreth 60 milionë euro më pak. Të dhënat tregojnë se vetëm në tremujorin e parë të këtij viti ka dërguar 6 milionë euro më pak se në të njëjtën periudhë të vitit të kaluar. Në vitin 2011 totali i të hyrave vjetore nga remitencat ka qenë 379.6 milionë euro, apo 14 për qind më pak sesa në vitin 2010, e që në total kanë qenë 442 milionë euro. Këto të dhëna u bënë publike gjatë prezantimit të projektit të UNDP-së dhe IOM-it “Inkuadrimi i diasporës në zhvillimin ekonomik”.

“Një e gjetur që bie në sy është se, me gjithë perceptimin publik, shuma e të hyrave të remitencave në Kosovë ka rënë për 14 për qind në vitin 2012 krahasuar me vitin paraprak, që paraqet një rënie të ashpër e cila ndodh pikërisht në mesin e krizës financiare në Evropë”, tha Osna Lubrani, përfaqësuese e përhershme e UNDP-së në Kosovë.

Ministri i Diasporës, Ibrahim Makolli, tha se studimet e tilla janë një ndihmesë për institucionet në hartimin e politikave të favorshme për të ardhmen e vendit.

“Ministria e Diasporës mbetet e përkushtuar që të japë gjithë kontributin e vet konform kornizave ligjore dhe ndër objektivat kryesore është identifikimi inkurajimi dhe përkrahja e investimeve të huaja, me theks të veçantë investimeve të pjesëtarëve të diasporës. Ministria e Diasporës, në bashkëveprim me institucionet e tjera shtetërore, do të angazhohet në hartimin e politikave të favorshme, për investime nga diaspora, sepse e vlerësojmë shumë të rëndësishme në këtë aspekt shqyrtimin e mundësive të krijimit të ofertave të favorshme fiskale, sidomos duke pasur parasysh faktin se investimet potenciale të pjesëtarëve të diasporës në vendin e tyre të origjinës, janë matësi kryesor i stabilitetit të ekonomisë në Kosovë dhe sinjal pozitiv shumë i rëndësishëm për investitorët nga shtetet e huaja”, tha Makolli.

Gazmend Luboteni, kryetar i Bordit të BQK-së, tha se dërgesat e emigrantëve janë shumë të rëndësishme për zhvillimin ekonomik të Kosovës.

“Dy segmente jashtëzakonisht të rëndësishme për fuqizimin e ekonomisë së Kosovës, janë dërgesat e emigranteve dhe investimet e huaja direkte. Mirëpo, për fat të keq, për shkak të ndikimeve të krizës financiare dhe zhvillimeve në eurozonë, ka pasur një rënie mjaft të konsiderueshme në tremujorin e parë të vitit 2012 në dërgesat e emigranteve, e që janë diku rreth 6 milionë euro. Mirëpo, megjithatë ne nuk jemi shumë pesimistë në këtë drejtim, për shkak se zakonisht në mesin e vitit kur është fluksi më i madh i punëtorëve tanë, që punojnë jashtë, mund të ndryshojë situata dhe të ngrihet ai niveli, i cili për momentin është më i ulët, në krahasim me vitin e kaluar. Kështu që përsëri jemi optimist”, tha Luboteni.

Jorge Baca, shef i misionit të IOM-it, tha se Kosova është duke dalë nga një histori e vështirë para së cilës ka pasur shumë sfida.

“Befasues mbetet solidariteti mes kosovarëve gjatë kohëve të vështira. Diaspora ka qëndruar prapa familjeve të tyre, duke dërguar miliona euro dhe se pas konfliktit ata kanë ndihmuar Kosovën në rindërtimin e saj. Sfidat për Kosovën janë ende të mëdha dhe se sfida më e madhe mbetet papunësia e cila është nga 40 deri në 50 për qind. Diaspora vazhdon t’i mbështet familjet e tyre me remitencat të cilat janë rreth 400 milionë euro, e që janë një kontribut substancial. Sfidë po ashtu mbetet edhe sjellja e diasporës për të investuar në Kosovë”, tha Baca.

Anketa e UNDP-së tregon se 25 për qind e familjeve kosovare pranojnë remitenca. Shumica prej tyre vijnë në para të gatshme nëpërmjet rrjeteve të institucioneve financiare, ndërsa pjesa tjetër sillet nga vetë diaspora. Pothuajse e gjithë remitenca që marrin kosovarët shpenzohet për ushqim, veshmbathje dhe banim.koha/kohaislame

Komuna e Deçanit dhe Kompania KELAG nga Austria kanë nënshkruar kontratën për ndërtimin e tri hidrocentraleve në Grykën e Deçanit, vlera e të cilëve është 55 milionë.

Krytari i Deçanit, Rasim Selmanaj, shpreson se ky partneritet do të jetë i qëndrueshëm dhe do të jetë në funksion të zhvillimit ekonomik në Deçan.

“Kapacitetet fillestare të prodhimit do të jenë 20 Mgvatë orë energji, që kapin vlerën prej 50 milionë euro investime. Por kjo është vetëm faza fillestare, ndërsa në fazën e ardhshme do të arrihen që nga këto hidrocentrale të prodhohen 100 MG orë energji dhe se deri atëherë parashihet të investohen 200 milionë euro”, citon RTK Georg Woeber, drejtor i KELAG.

Energjia e parë do të rrjedh në dimrin e 2013, ndërsa rreth 50 mijë familje në rajon mund të furnizohen me energji elektrike gjatë gjithë vitit.koha/kohaislame

“Në vitin 2014, sipas mesatares së bruto prodhimit të brendshëm, Shqipëria do të jetë përpara Serbisë, sepse falë emigracionit, ajo nuk është në një krizë bankare dhe nuk ka parë rënie të GDP-së në vitet e fundit. Në vitin 2014, vetëm Bosnje dhe Hercegovina do të jetë më e varfër se Serbia”, theksoi Mirolslav Zdravkovic, asistent në Institutin e Ekonomisë të Beogradit.

Shpenzimet për kokë banori në Serbi janë rreth 2.5 herë nën atë të evropianëve, apo 44 për qind të mesatares së BE-së, një rritje prej 1 për qind që nga viti 2010, sipas rezultateve më të fundit të Eurostat.

Ekonomikisht, Serbia mbetet pas Bullgarisë e cila ka GDP-në më të ulët për kokë banori në BE: 45 për qind të mesatares evropiane.

Miroslav Zdravkovic, një asistent në Institutin e Ekonomisë të Beogradit, tha se kur vjen puna te standardi i jetesës, Serbia është në rënie siç janë vende të tjera të Ballkanit Perëndimor. Parashikimet e tij afat-gjata nuk janë aspak të favorshme.

“Në vitin 2014, sipas mesatares së bruto prodhimit të brendshëm, Shqipëria do të jetë përpara Serbisë, sepse falë emigracionit, ajo nuk është në një krizë bankare dhe nuk ka parë rënie të GDP-së në vitet e fundit. Në vitin 2014, vetëm Bosnje dhe Hercegovina do të jetë më e varfër se Serbia”, tha Zdravkovic.

Ai shtoi se pagat në Serbi janë pesë herë më të ulëta se në vendet perëndimore, por çmimet e shërbimeve të tilla si kujdesi shëndetësor dhe arsimi janë vetëm pak më të ulëta, që jep një standard tri herë më të ulët jetese në Serbi se sa në Perëndim.

“Ne jemi një shtet i falimentuar dhe përderisa të mos formohet një shtet i ri nuk do të ketë përparim. Në se hyjmë në gjeopolitikë, Kosova dhe Shqipëria kanë rritje ekonomike të pakontrolluara, ndërsa Serbia me vetëdije dhe apostafat e shtyn veten poshtë,” tha Zdravkovic.

Ndërsa standardi i jetesës në Serbi ka rënë me të shpejtë gjatë tri vjetëve të fundit, numri i të papunëve u rrit dhe vazhdon të ngrihet, paralajmëroi Danilo Sukovic, i Institutit për Kërkimin Social në Beograd.

“Me një ekonomi gjithnjë e më të varfër, rrogat dhe pagesat e rregullta bëhen gjithnjë e më të pasigurta”, tha Sukovic.

“Pas ndryshimeve demokratike në vitin 2000, qeveritë e reja jo vetëm që dështuan të shfrytëzojnë mundësinë, por më së shumti vazhduan me sistemin e Miloshevicit, me një dallim se nuk pati vetëm një parti politike dhe as sanksione e izolim nga institucionet ndërkombëtare”, tha Sukovic.

Mjaft para të pista rodhan nëpërmjet ndërmarrjeve private, raste të vjedhjes e mashtrimit u fshehën dhe magnatët qeverisën Serbinë, shtoi ai. Institucionet po punojnë në interes të magnatëve dhe politikanëve, ndërsa populli po bëhet më i varfër.

“Ne qemë në gjendje ta mbulonim këtë me investimet e huaja, por e gjitha doli në sipërfaqe me shfaqjen e krizës globale. Megjithatë, ne do ta kishim gjetur veten në këtë situatë edhe pa rënien globale”, theksoi Sukovic.

Zgjidhja e problemit, tha ai, është të ndërpriten lidhjet midis pushtetit ekzekutiv, partive politike, magnatëve dhe gjyqësorit.

“Gjithçka duhet të jetë transparente, ne na duhen rezultate të mëdha në luftën kundër korrupsionit: një arrestim si i Sanaderit në Kroaci. Ata që e sollën këtë duhet të mbahen përgjegjës. I tërë procesi i privatizimit duhet të rishqyrtohet”, shtoi Sukovic.

Për shtetasit situata është e thjeshtë: standardi i tyre i jetesës është i ulët.

“Jam ndeshur përditë me faktin se standardi është tri herë më i ulët se në Evropë. Kur shkoj për ditë në dyqan, jam i vetëdijshëm se sa e shtrenjtë është çdo gjë dhe se nuk mund të përballoj çmimet”, tha pensionisti 67 vjeçar, Slavoljub Dragic./SETimes/kohaislame

Sipas një kopjeje të aktgjykimit të OKB-së të publikuar të hënën, ministri i atëkohshëm i energjisë, Ethem Çeku, dhe zëvendësshefi i UNMK-ut, Steven Schook, do të pranonin ryshfet si pjesë e marrëveshjes së termocentralit.

Një skandal tjetër sapo është bërë i ditur, pasi një ish zyrtar i lartë amerikan në UNMIK, u shtyp aq keq nga shefat e tij, sa mbet i papunë si të ishte thjesht një qytetar i Kosovës. A e dini pse i ndodhi kjo një amerikani?
Ai kishte arritur të vinte në lëvizje një mekanizëm hetimi për të parandaluar korrupsionin më të madh, që pritej të ndodhte në historinë e Kosovës.
Ishte koha kur po përfolej me bujë për ndërtimin e një termocentrali gjigand, prej 2 mijë megavatesh, sa tri herë kapacitetet ekzistuese të dy termocentraleve aktuale, Kosova A dhe Kosova B. Kuptohej sa më të mëdha termocentralet, më të mëdha do të ishin përqindjet dhe sa më të mëdha përqindjet, xhirollogaritë do të ishin më të trasha.
Dy apo tre miliardë euro të supozuara për t’u investuar mund të çonin, me vetëm 10 për qind zhvatje, në krijimin e një pasurie marramendëse prej qindra miliona eurosh, ndërsa për më të vegjlit në vetëm disa dhjetëra miliona euro. E gjitha mund të duket si një ëndërr, por e vërteta është më e trishto. Kështu në Kosovë ndërtuan pasurinë marramendëse shumë biznesmen dhe politikan./BS/kohaislame