Sa je i përkushtuar për ta arritur qëllimin tënd? Fokusi duhet të ketë theks të veçantë në përkushtim, jo në motivim. Në mendjen tonë ndikon përkushtimi maksimal, i cili pasohet dhe përcjellet padyshim me motivim.
“Bëhu i varur nga një përmirësim i vazhdueshëm dhe i pafund.”Anthony J. D’Angelo
Sa është i rëndësishëm për ty, çka je i gatshëm të sakrifikosh për të arritur suksesin si për shembull: daljet me shoqëri, punë në orët e vona, shpenzimet e tepërta, kohën me familje, disiplinën, vetëpërmirësimin e vazhdueshëm…?
Është e rëndësishme të largoni mendimet negative. Ato ndikojnë në ndjenja, ndërsa ndjenjat ndikojnë në të menduarit tonë karshi punës. Vazhdimisht keni mendime të ndryshme dhe ti e ke zgjidhjen se cilat mendime do t’i kultivosh. Shumica prej mendimeve janë me frikë dhe dyshim. Nuk është lehtë ta kthesh mendjen e ta mbash nën kontroll, mirëpo PROVO. Bëje me konsistencë dhe fokusohu në vlera dhe mendime pozitive, pa marrë parasysh ndërhyrjet negative që të vijnë në mendje kohë pas kohe.
Udhëheqësit e kompanisë kanë përgjegjësinë për edukimin e punonjësve, për vlerat dhe vizionin e kompanisë. Së pari, punonjësit duhet ta dinë pse kompania e bën atë që bën. Kur punonjësit janë të lidhur emocionalisht me vizionin, besojnë në atë që bëjnë, janë të përkushtuar dhe besnikë ndaj kompanisë. Angazhimi pastaj do të rrjedhë në mënyrë natyrale.
Një studim për suksesin, i bërë në Harvard me shitësit më të mirë, i tregon të gjitha atributet që ndërlidhen me qëndrimet e tyre:
- Të gjithë ata kanë vetëbesim dhe vetëvlerësim;
- Ata pranojnë tërësisht përgjegjësinë për rezultatet e tyre;
- Ambicia dhe dëshira e tyre për të shitur është mbi normalen;
- Ata kanë nivel të lartë të ndjeshmërisë ndaj konsumatorëve;
- Ata janë të përkushtuar për arritjen e qëllimit;
- Ata kanë dëshirë të jashtëzakonshme për të korrur sukses;
- Ata besojnë tek vetja, tek produkti dhe tek kompania e tyre;
- Ata janë të sinqertë me konsumatorët e tyre dhe me vetveten;
- Ata kanë prirje të krijojnë raport – me këdo;
- Ata vazhdimisht investojnë tek vetja e tyre – duke lexuar, hulumtuar në internet dhe duke ndjekur seminare e trajnime.
Karakteristikat e produktit janë veçoritë e produktit tuaj që e përshkruajnë pamjen, përbërësit dhe mundësitë e tij. Një shembull konkret mund të përdoret për këtë: “Zonjusha Marigonë, kjo karrige është me rrota, konstruksionin e ka të metaltë, e mbështjellë me lëkurë origjinale dhe ka mundësi të ngrihet lart, të shtrihet dhe të përshtatet sipas gjatësisë së personit”.
Avantazhet janë përparësitë e produktit tënd në krahasim me atë të konkurrencës. Gjatë procesit të prezantimit të produktit duhet t’i jepni rëndësi dhe ta potenconi secilin detaj që ju dallon sado pak prej konkurrencës: kualitetin, shërbimin, dërgesën e mallit, mënyrën e punës, ngjyrën, materialin, dizajnin, efikasitetin, kujdesin ndaj konsumatorit etj.
Nëse çmimi është më i shtrenjtë, atëherë në fund mund ta theksoni se çmimi është më i shtrenjtë se i konkurrencës. Kjo duhet ta argumentohet me vlerën të cilën e ofron në përputhje me çmimin. Për ta bërë këtë më së miri, duhet ta kemi të plotësuar tabelën krahasuese me konkurrencën. Plotësimi i tabelës bëhet në bazë të hulumtimit të tregut. Informatat më të sakta dhe më reale që i merr janë prej konsumatorëve tuaj, të cilët tregtojnë apo bashkëpunojnë edhe me konkurrencën tënde. Prej konsumatorëve i merrni informatat e sakta për ofertat e konkurrencës, për sjelljen dhe komunikimin e stafit me konsumatorë, për shërbimin e mirë apo të keq, për profesionalizmin e tyre, për strategjinë e shitjes së konkurrencës.
Autor : Denis Gafuri
