Samiti i 49-të i G7 do të mbahet nga 19 – 21 maj 2023 në Hiroshima, Japoni. Ndërkohë, më 11 maj, drejtuesit financiarë të grupit, u takuan për shkak të situatës së shqetësuar për mungesën e një marrëveshje mbi ndryshimin e tavanit të borxhit të SHBA-së, e cila duket se mund të jetë një nga kërcënimet më të mëdha potenciale, për ekonominë globale.
Sekretarja e Thesarit të SHBA-së, Janet Yellen, tha se një nga prioritetet e saj, do të ishte të theksonte rëndësinë e zgjidhjes së bllokimit të borxhit kombëtar në ekonominë e vendit.
Nga bllokimi mbi shpenzimet, qeveria rrezikon të jetë e paaftë të paguajë për mësuesit, kujdesin mjekësor për veteranët dhe përfitimet jetike për shumë amerikanë.
Presidenti Joe Biden tha se ai dhe udhëheqësit e Kongresit, patën një takim “produktiv”, në përpjekje për të rritur kufirin e borxhit të vendit. Ata do të takohen sërish ditën e premte, për të shmangur rrezikun e një dështimi të paprecedentë të qeverisë, nëse ligjvënësit në Kongres nuk bien dakord të rrisin tavanin e borxhit.
Biden tha se ishte “absolutisht i sigurt” se vendi mund të shmangte një falimentim, duke deklaruar se dështimi për të përmbushur detyrimet e Amerikës, mbi të cilat bazohen shumica e financave të botës, “nuk është një opsion”.
Biden tha se mund të duhej të shtynte udhëtimin e tij në Japoni, Australi dhe Papua Guinenë e Re.
Sekretarja e Thesarit tha se forcimi i sistemit financiar global, është një prioritet kyç i G-7, pasi një koalicion prej mbi 30 vendesh kërkon t’i imponojë Rusisë kosto të rënda ekonomike, për luftën që ka ndërmarrë.
Ajo tha se investimet “historike” të Biden në modernizimin e infrastrukturës amerikane, ishin një hap drejt përmirësimit të qëndrueshmërisë së një ekonomie, varësia e së cilës në zinxhirët globalë të furnizimit u testua së tepërmi gjatë pandemisë COVID-19.
Rezerva Federale tha në një raport se bankat amerikane, rritën standardet e tyre të huadhënies për bizneset dhe kreditë konsumatore, si pasojë e tre falimentimeve të bankave, që u shkaktuan pjesërisht nga rritja e mprehtë normave të interesit të bankës qendrore, për të mposhtur rritjen e inflacionit, në nivelet më të larta të katër dekadave.
Rritja e normave synon të ngadalësojnë kreditimin dhe huamarrjen, por mund të tejkalojnë qëllimin e tyre, duke e futur ekonominë në recesion. Lëvizjet e bankave për të kufizuar më tej kreditimin, mund të krijojnë edhe më shumë vështirësi për bizneset dhe konsumatorët.
Inflacioni ka mbetur i lartë. Çmimet e konsumit në Shtetet e Bashkuara u rritën me 0.4% në prill, ndërsa rritja vjetore 4.9%, ishte më e vogla në dy vjet.
Ekonomitë e tjera të G-7, po luftojnë kundër rritjes së vazhdueshme të çmimeve, duke i detyruar bankat qendrore të rrisin normat e interesit, që arritën nivele rekord ditët e para të pandemisë.
Drejtuesit financiarë të G-7, u takuan një muaj më parë, në Uashington, gjatë takimit vjetor të Bankës Botërore dhe Fondit Monetar Ndërkombëtar, ku ata përsëritën angazhimin e tyre për të ndihmuar ekonomitë, të përballen me ndikimin e luftës në Ukrainë, për të ndihmuar vendet me borxhe të mëdha të zgjidhin cenueshmërinë e tyre financiare, të forcojnë sistemet globale shëndetësore dhe të ndihmojnë në trajtimin e ndryshimeve klimatike.
Kombet e G-7 përfshijnë Kanadanë, Francën, Gjermaninë, Italinë, Japoninë, Mbretërinë e Bashkuar dhe Shtetet e Bashkuara. Të ftuar të tjerë në takimet në Niigata përfshijnë Bashkimin Europian, FMN dhe Bankën Botërore, si dhe ministrat e financave të Brazilit, Komoros, Indisë, Indonezisë, Koresë së Jugut dhe Singaporit.
/ Associated Press
