Çdo gjë mund të përmblidhet me vetëm një fjalë
Kur drejtoni një biznes ose menaxhoni njerëz, mund të ndodhin aq shumë situata delikate saqë marrja e përgjegjësisë për diçka (qoftë kjo e mirë apo e keqe) dhe komunikimi i ndershëm është zakonisht metoda më e mirë për t’u ndjekur, pavarësisht rreziqeve që paraqet ajo.
Ka një fjalë për këtë tipar: transparenca. Kur mendoni për transparencën, çfarë ju vjen menjëherë në mendje? Megjithëse ky tipar i fuqishëm i lidershipit është i dobishëm në shumë rrethana, liderët duhet së pari të kapërcejnë frikërat e tyre.
Një nga arsyet kryesore pse liderët kanë frikë nga të qenët transparentë është fakti se ata besojnë që, nëse e bëjnë këtë gjë, do të duken më pak autoritarë; ata druhen se besueshmëria e tyre do të humbasë fuqinë e saj.
Megjithatë, përfitimet nga transparenca janë të jashtëzakonshme. Ajo promovon një kulturë të hapur të respektit dhe të dinjitetit, pa metaforat e zakonshme toksike të korporatave, të tilla si thikat pas shpine, thashethemet dhe lënia e fajit te të tjerët Një biznes i ngritur rreth tiparit të transparencës ka pasur dhe gjithmonë do të ketë në qendër ekipin – marrëdhëniet e forta, bashkëpunimin dhe rezultatet.
Fuqia e transparencës
I ndjeri Warren Bennis, një studiues i lidershipit dhe autor i shumë librave rreth kësaj teme, ka dhënë prova për rëndësinë e transparencës në kulturën e biznesit. Ai vuri në dukje një studim në veçanti, ku 27 kompani amerikane të njohura si “më transparentet” ia kaluan indeksit S&P 500 me 11.3 për qind.
Por, pyetja e rëndësishme vazhdon të mbetet kjo: Si bëhet “transparent” një lider (ose një ekip i tërë drejtuesish)? Ja çfarë rekomandohet.
- Jini sa më i disponueshëm
Qëndroni në vijën e parë të frontit, përballuni me ekipin tuaj, lëvizni në të katra qoshet e kompanisë dhe ndani personalisht me punonjësit planet për të ardhmen. Komunikoni gjërat e rëndësishme me njerëzit tuaj. Qëndroni në mesin e kolegëve dhe ndiqni lidhjet e tyre me njëri-tjetrin.
- Mbani fjalën
Nëse nuk e keni përgjigjen për një pyetje ose shqetësim të caktuar, sigurojeni punonjësin tuaj që do të bëni verifikimet e nevojshme dhe do të ktheheni tek ai brenda një kohe të caktuar bashkë me përgjigjen. Dhe, më e rëndësishmja, qëndrojini kësaj fjale të dhënë.
Mbajtja e fjalës edhe për gjëra të vogla tregon se njerëzit tuaj mund të mbështeten te ju. Kjo është shumë e rëndësishme për marrëdhëniet që krijoni, sepse, kur përballeni me probleme më të mëdha, njerëzit do të besojnë se ju do të jeni atje duke vazhduar të bëni atë që thoni. Mbajtja e fjalës do të forcojë besueshmërinë tuaj.
- Jini të hapur për të ardhmen
Një nga mënyrat për të qenë më i besueshëm përpara punonjësve tuaj është që t’u ofroni atyre një perspektivë për atë që po bëjnë. Komunikoni për mënyrën se si puna e tyre lidhet me të ardhmen. Informojini ata për kontekstin më të madh të gjërave, jo thjesht për punën që bëjnë, por edhe për arsyen pse e bëjnë atë.
Transparenca në këtë kontekst i bën punonjësit që të thonë me bindje: “Unë i besoj të ardhmes”. Kjo u jep atyre besim lidhur me drejtimin se ku kompania do të shkojë në të ardhmen, bashkë me vetë ata.
- Jini të qartë për vizionin e kompanisë
Komunikimi i vizionit për ekipin tuaj është diçka shumë e mirë, por nëse strategjia ose qëllimet për realizimin e vizionit janë të paqarta, njerëzit tuaj nuk do të jenë të angazhuar. Mbani mend, është pse-ja e një kauze ajo që i motivon punonjësit në nivelin emocional dhe intelektual, për të shkuar përpara dhe për të tejkaluar pritshmëritë.
Jepuni qëllime dhe pritshmëri të qarta punonjësve tuaj, duke ofruar përgjigjen e pyetjes “pse” – bazën ideologjike për qëllimet e vendosura. Kur ky informacion ndahet çdo javë me ta, ata do të ndiejnë të njëjtin pasion me drejtuesit e tyre për t’i përmbushur qëllimet. / INC
Comments are closed.