A ndiheni jashtëzakonisht të mbingarkuar kur shihni listën me detyrat që duhet të bëni?
A ju duket sikur këto detyra nuk do të mbarojnë kurrë dhe sa vijnë e shtohen gjithnjë e më tepër? A keni frikë të hapni laptopin tuaj, sepse e dini që aty do të shikoni detyrat tuaja të paorganizuara dhe të çrregullta? Të gjithë e përjetojnë këtë ndjesi.
Ndoshta është koha për të rimenduar mënyrat sesi menaxhoni listën e gjatë të detyrave që duhet të bëni.
- Hiqni detyrat me prioritet të ulët
E vërteta është se ju nuk keni mundësi për t’i bërë të gjitha. Hapi i parë për të menaxhuar listën tuaj të detyrave është që t’i renditni ato sipas rëndësisë. Mundohuni të identifikoni detyrat me prioritet më të ulët.
Hidhini një sy listës dhe vlerësoni rëndësinë e secilës prej detyrave të renditura aty. Nëse një detyrë e konsideroni të parëndësishme, atëherë hiqeni atë nga lista. Në realitet, disa detyra është më mirë t’i hiqni fare nga lista, sesa të harxhoni kohë për t’i kryer. Vetëm për shkak se një detyrë ndodhet në listën tuaj, kjo nuk do të thotë domosdoshmërisht që ju duhet ta bëni atë.
Detyrat me prioritet të ulët shpesh ndodhen në listën tuaj pa ndonjë arsye specifike, por megjithatë, ato janë pengesat më të mëdha që nuk ju lejojnë të përqendroheni te detyrat e tjera me prioritet të lartë.
Zakonisht, këto detyra kanë rëndësi në momentin që i shkruani në listë, por nëse kalon pak kohë, ato thjesht zgjidhen vetë dhe nuk kërkojnë më vëmendjen tuaj. Në fakt, ato shpesh etiketohen si detyra “pa prioritet” dhe jo vetëm që e bëjnë listën tuaj shumë më të gjatë sesa është, por ju orientojnë në një drejtim krejtësisht tjetër, duke penguar kështu produktivitetin tuaj.
Përdorni aftësitë tuaja gjykuese për të përcaktuar rëndësinë e këtyre detyrave. Për secilën prej tyre, pyesni veten: “A është e nevojshme kjo?”. Nëse përgjigjja është “jo”, atëherë hiqeni nga lista dhe mos humbisni kohën me të.
- Kombinoni së bashku detyrat e ngjashme
Është e rëndësishme t’i kujtoni vetes se jeni një njeri, jo robot. Ndryshe nga një kompjuter, ju nuk mund të ekzekutoni në mënyrë efektive shumë procese në të njëjtën kohë. Trurit i duhet kohë për t’i përpunuar gjërat sa herë që ndryshon konteksti dhe kjo gjë ju pengon për të vazhduar me rrjedhën tuaj të të punuarit.
Çelësi i produktivitetit është gjetja e rutinës së duhur. Pasi të keni gjetur ritmin tuaj, do të jetë shumë më e lehtë për ju që të vazhdoni rrjedhën tuaj të punës në mënyrë efektive dhe efikase. Kjo do t’ju ndihmojë për të përmbushur detyrat në një kohë të shpejtë dhe pa reduktuar cilësinë e punës tuaj. Për të gjetur këtë ritëm, grupimi i detyrave të ngjashme së bashku do t’ju ndihmonte shumë.
Grupimi i detyrave është një strategji efektive e produktivitetit, e cila ju mundëson që të shmangni ndërrimin e kontekstit.
Duke kategorizuar punën tuaj, ju do të jeni në gjendje të gjeni një qasje të përsosur që mund të zbatohet për një sërë detyrash, duke e organizuar punën në një mënyrë të tillë që t’ju duket sikur po kryeni në mënyrë të vazhdueshme të njëjtën detyrë dhe nuk po kaloni sa nga njëra punë te tjetra.
Kjo jo vetëm që do ta bënte listën tuaj të detyrave shumë më të organizuar dhe më të lehtë për t’u kuptuar, por gjithashtu do të përmirësonte shpejtësinë dhe efikasitetin tuaj.
- Bëni një listë të detyrave të përfunduara
Në listën suaj të detyrave, është po kaq e rëndësishme që të përfshini detyrat e përfunduara. Kjo jo vetëm që do t’ju ndihmojë për të ndjekur progresin, por gjithashtu do t’ju bëjë që të rrisni vetëbesimin tuaj, duke parë se sa produktivë keni qenë.
Në rast se vini re se po ju nevojitet shumë kohë për të plotësuar listën tuaj të detyrave të përfunduara, kjo është një shenjë që duhet të konsideroni përsëri shpejtësinë me të cilën po punoni. Ndoshta ju jeni duke harxhuar shumë kohë me një detyrë që nuk është urgjente?
Ndoshta po kaloni shumë kohë duke parë postën tuaj elektronike? Ndoshta po u jepni përparësi detyrave që nuk janë më prioritare? Kjo është mundësia juaj për të rivlerësuar dhe për të përshtatur listën tuaj, në mënyrë që të arrini kuotën ditore./entrepreneur/
Comments are closed.