Emoji-t janë një armë e fshehtë në marketing, shërbimin e klientëve dhe mediat sociale – sipas një sondazhi të fundit nga Adobe
Emoji-t nuk janë vetëm një formë argëtuese e komunikimit dixhital, por edhe një mjet i rëndësishëm në shitje. 42% e përdoruesve të emoji-t kanë më shumë gjasa të blejnë produkte të reklamuara që përdorin emoji, sipas një sondazhi të ri.
I kryer nga Adobe me rastin e Ditës Botërore të Emoji, më 17 Korrik, sondazhi analizoi sjelljen e 7 mijë përdoruesve të emoji në Shtetet e Bashkuara të Amerikës, Mbretërinë e Bashkuar, Gjermani, Francë, Japoni, Australi dhe në Korenë e Jugut. Gjysma e përdoruesve të emoji-t mendon se markat janë më të besueshme kur përdorin emoji në marketingun online, veçanërisht për markat e sektorit ushqimor, veshjeve dhe shërbimeve streaming.
“Emoji-t mund të bëjnë diferencën kur flitet për përqindjen e leximit të email-eve, mbi të gjitha kur përfshihen brezat e rinj” – thotë Paul D. Hunt, zhvillues i karaktereve dhe shkronjave në Adobe dhe krijues e emoji-ve gjinore gjithëpërfshirëse.
“Ndërkohë që mund të duken një mënyrë e lehtë dhe argëtuese për të komunikuar, na ndihmojnë të lidhemi më thellë me ndjenjën, shpesh e humbur me vetëm fjalë”.
Në fakt, njerëzit që komunikojnë me emoji shpesh zhvillojnë afrimitet mes tyre. 60% e të gjithë përdoruesve të emoji – dhe 70% e përdoruesve të Gen-Z – thonë se kanë më shumë gjasa të hapin një email apo njoftime që përmbajnë emoji – veçanërisht nëse është emoji që pëlqejnë më shumë. Tre emoji-t më të pëlqyera ndër të intervistuarit janë fytyra që qan dhe qesh, dora me gishtin e madh të ngritur (kur jep miratim për Ok) dhe një zemër e kuqe.
Përdorimi i emoji-ve mund të ndihmojë edhe në shërbimin ndaj klientit, veçanërisht me klientët më të rinj. Pothuajse gjysma (49%) e Gen-Zers thonë se preferojnë ekipet për shërbimin e klientëve që përdorin emoji në chat-e ose email.
/ INC
