Ngritja e gazetarit robot nënkupton ndryshime të thella në natyrën e lajmit, shkruan The Economist
Një lajm i bujshëm u publikua në Twitter muajin e kaluar nga Radio Publike Kombëtare e Amerikës: “raketa masive space sex” e Elon Musk kishte shpërthyer gjatë lançimit.
Mjerisht, ky ishte një gabim i automatizuar i emrit SpaceX, kompanisë së raketave të miliarderit. Ky gabim mund të jetë një shembull i asaj që do të vijë, teksa Inteligjenca Artificiale po luan rol gjithnjë e më të madh për redaksitë e lajmeve.
Makineritë kanë ndihmuar në shpërndarjen e lajmeve për vite me radhë: Associated Press (AP) filloi të botojë raporte të automatizuara të të ardhurave të kompanive në vitin 2014.
New York Times përdor makineritë për të vendosur sa artikuj falas do t’u tregojë lexuesve përpara se të kërkohet pagesa. Bayerischer Rundfunk, një transmetues publik gjerman, moderon komentet në internet me ndihmën e Inteligjencës Artificiale.
Associated Press tani gjithashtu e përdor atë për të krijuar “lista plani” të videove, duke përshkruar se kush dhe çfarë është në çdo klip.
Ndërsa Inteligjenca Artificiale përmirësohet, ajo po merr më shumë role krijuese.
Një prej tyre është mbledhja e lajmeve. Në Reuters, makineritë kërkojnë modele në grupe të mëdha të dhënash. Associated Press e përdor Inteligjencën Artificiale për “zbulimin e ngjarjeve”, duke skanuar mediat sociale për valë lajmesh.
Në një konferencë gazetarie muajin e kaluar në Perugia, Itali, Nick Diakopoulos në Universitetin Northwestern, tregoi se si ChatGPT, një chatbot i njohur, mund të përdorej për të nxjerrë lajme interesante nga punimet kërkimore.
Gjykimet e modelit të tij dhe ato të redaktorëve njerëz, kishin një koeficient korrelacioni prej 0.58, një përputhje mjaftueshëm e ngushtë për të ndihmuar një redaksi të zënë.
Udhëzimet “gjeneruese” të ngjashme me ChatGPT, po bëhen më të mira edhe në shkrim dhe redaktim. Semafor, një startup lajmesh, po përdor Inteligjencën Artificiale për të kontrolluar lajmet.
Radar AI, një firmë britanike, krijon tekste të mbështetura në të dhëna, për gazetat lokale (“ZBULIM: Kjo hartë tregon numrin e tualeteve të aksesueshme në Essex-in Jugor”).
Pesë gazetarët e saj kanë paraqitur më shumë se 400,000 histori pjesërisht të automatizuara që nga viti 2018.
Në nëntor, Schibsted, një firmë mediatike norvegjeze, krijoi një mjet të Inteligjencës Artificiale për t’i kthyer artikujt e gjatë në paketa të shkurtra për rrjetin social Snapchat.
Drejtuesit e lajmeve shohin potencial në riformësimin automatik të historive për formate ose audienca të ndryshme.
Disa ndiejnë një ndryshim të thellë në atë që kjo nënkupton për industrinë e lajmeve. Inteligjenca Artificiale “do të ndryshojë gazetarinë më shumë në tre vitet e ardhshme se sa ka ndryshuar gazetaria në 30 vitet e fundit”, parashikon David Caswell nga BBC News.
Duke kombinuat informacionin nga i gjithë interneti, modelet gjeneruese po “ndryshojnë njësinë themelore të gazetarisë”, artikullin. Në vend të një drafti të parë të vetëm mbi një histori të caktuar, thotë zoti Caswell, lajmi mund të bëhet “një lloj ‘supe’ gjuhësore, që përjetohet ndryshe nga njerëz të ndryshëm”.
Shumë gazetarë po shqetësohen për punët e tyre. Ashtu si në industri të tjera, punëdhënësit e portretizojnë Inteligjencën Artificiale si një asistent, jo si një zëvendësim. Por kjo mund të ndryshojë.
“Ne nuk jemi këtu për të shpëtuar gazetarët, ne jemi këtu për të shpëtuar gazetarinë”, tha Gina Chua, redaktore ekzekutive e Semafor, në konferencën në Perugia. Industria ka nevojë për gjithë ndihmën e mundshme.
Më 20 prill, BuzzFeed mbylli seksionin e lajmeve që kishte fituar çmimin Pulitzer.
Një javë më vonë, agjencia e medias dixhitale Vice, bëri shkurtime dhe thuhet se po përgatitet për falimentim. Siç thotë Lisa Gibbs nga Associated Press: “Për sa u përket sfidave për punësimin e gazetarëve, Inteligjenca Artificiale nuk është më e larta në listë”.
/monitor.al/
“Shkrimtarë fantazmë”, Inteligjenca Artificiale po bën lëmsh gazetarinë.
