Nëse blerësi/klienti në financimin murabahah nuk është në gjendje të paguajë sipas datave të dakorduara në marrëveshjen murabahah, ai ndonjëherë kërkon nga shitësi/banka riplanifikimin e kësteve. Në bankat konvencionale, kreditë zakonisht riplanifikohen mbi bazën e interesit shtesë. Kjo nuk është e mundur në pagesat murabahah. Nëse këstet riplanifikohen, nuk mund të tarifohet asnjë shumë shtesë për riplanifikimin. Shuma e çmimit murabahah do të mbetet e njëjtë në të njëjtën monedhë.
Disa banka islame kanë propozuar që çmimi murabahah të riplanifikohet në një monedhë të fortë të ndryshme nga ajo në të cilën është kryer shitja fillestare. Kjo është propozuar për të kompensuar bankën përmes rritjes së vlerës së monedhës së fortë. Meqenëse ky përfitim synohej të merrej nga riplanifikimi, nuk është i lejuar. Riplanifikimi duhet të bëhet gjithmonë mbi bazën e së njëjtës shumë në të njëjtën monedhë. Megjithatë, në momentin e pagesës, blerësi mund të paguajë me pëlqimin e shitësit në një monedhë të ndryshme, bazuar në kursin e këmbimit të asaj dite (d.m.th. ditës së pagesës) dhe jo në kursin e datës së transaksionit.
