Shefja e Fondit Monetar Ndërkombëtar, Kristalina Georgieva deklaroi se pandemia COVID-19 po përshpejtohet në shumë vende dhe pasiguria është jashtëzakonisht e lartë.
Fondi parashikoi se ekonomia botërore do të rritet me 5.5 për qind në vitin 2021 apo 0.3 pikë përqindje mbi parashikimin e saj në muajin tetor 2020.
Georgieva shtoi se ka disa faktorë që përcaktojnë parashikimet për vitin 2021, përfshirë disponueshmërinë e vaksinave dhe mbështetjen efektive të politikave të ofruara si në aspektin e politikës fiskale, ashtu edhe të asaj monetare.
“Ne shohim një pasiguri të madhe për vitin 2021, për shkak se gara midis një virusi ndryshues dhe vaksinave nuk ka mbaruar ende sepse ekziston një ekuilibër. 150 vende nuk do të arrijnë nivelin e zhvillimit të ekonomisë para-pandemik në vitin 2021 dhe 110 ende nuk do të arrinin nivelin para-pandemik edhe në 2022”, tha Georgieva.
Sipas saj, ky është një shqetësim i madh për FMN-në. Mund të ketë një divergjencë midis vendeve që janë rimëkëmbur shpejt dhe atyre që janë prapa. Gjysma e vendeve në zhvillim po shohin që nivelet e të ardhurave të tyre bien më tej sesa të arrihen. Me fjalë të tjera, theksoi Georgieva, në vend që të ketë konvergjencë në botë, secili vend po sheh një rrezik të divergjencës.
Disponueshmëria e vaksinave dhe efektiviteti i tyre është burimi më i rëndësishëm i pasigurisë për parashikimin e FMN në vitin 2021. Nëse bota lëviz shpejt dhe vaksinat janë efektive, ky institucion mund të parashikojë një performancë më të mirë.
